គោលដៅសំខាន់ៗ

ផ្តោតអាទិភាពលើការបង្កើនប្រសិទ្ធភាពនៃការគ្របដណ្តប់ដោយប្រព័ន្ធគាំពារសុខភាពសង្គម ដែលមានស្រាប់ និងការបន្តពង្រីកវិសាលភាពគ្របដណ្តប់លើក្រុមពលរដ្ឋគោលដៅផ្សេងទៀតជាជំហានៗ រួមមាន៖ ការបង្កើនប្រសិទ្ធភាពការគ្របដណ្តប់មូលនិធិសមធម៌សុខាភិបាល, និងរបបសន្តិសុខសង្គមផ្នែកថែទាំសុខភាព, ការពិនិត្យឡើងវិញ និងវាយតម្លៃប្រសិទ្ធភាពនៃការគ្របដណ្តប់ពលរដ្ឋដោយប្រព័ន្ធគាំពារសុខភាពសង្គម, ការប្រែក្លាយរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត ទៅជារបបកាតព្វកិច្ច និងការជ្រើសរើសគំរូហិរញ្ញប្បទាន, ការពង្រីកវិសាលភាពដល់ក្រុមពលរដ្ឋគោលដៅ ដែលនៅសេសសល់,និងការគ្រប់គ្រងការផ្លាស់ប្តូរសមាជិកភាព រវាងរបបសន្តិសុខសង្គមផ្នែកថែទាំសុខភាព និងមូលនិធិសមធម៌សុខាភិបាល។

ផ្តោតអាទិភាពលើការពង្រីកការគ្របដណ្តប់សេវាសុខាភិបាលសារវន្តដែលមានគុណភាព និង អាចឆ្លើយតបនឹងតម្រូវការរបស់ពលរដ្ឋ ជាពិសេសសេវាថែទាំសុខភាពបឋម ដែលក្នុងនោះជម្រើសគោលនយោបាយសំខាន់ៗមួយចំនួនដែលនឹងត្រូវដាក់ចេញ រួមមានការពង្រឹងនិយ័តកម្មលើសេវា សុខាភិបាលឯកជនគ្រប់កម្រិត, ការដាក់ឱ្យដំណើរការប្រព័ន្ធទទួលស្គាល់គុណភាពសេវាសុខាភិបាល ដែលមានឯករាជ្យភាពនិងការរៀបចំដាក់ឱ្យអនុវត្តនូវក្របខណ្ឌស្តីពីការចូលរួមរបស់វិស័យសាធារណៈ និងឯកជន, ការពង្រីក និងពង្រឹងសេវាសុខាភិបាលសារវន្ត ជាពិសេសសេវាថែទាំបឋម តាមអភិក្រមសេវាសុខាភិបាលសមាហរ័ណ ដែលផ្តោតលើពលរដ្ឋជាស្នូល, ការពង្រឹង និងពង្រីកសេវាឯកទេស និងសេវាសង្គ្រោះបន្ទាន់, ការពង្រឹងយន្តការគ្រប់គ្រង និងបែងចែកឱសថ, ការពង្រឹង និងធ្វើឱ្យមានសង្គតិភាពប្រព័ន្ធបញ្ជូនជំងឺ និងគោលនយោបាយទ្វារបាលកិច្ច, ការរៀបចំបង្កើតកញ្ចប់តាវកាលិកគោលសម្រាប់ ប្រព័ន្ធគាំពារសុខភាពសង្គម, និងការលើកកម្ពស់ការចូលរួមរបស់សហគមន៍ក្នុងវិស័យសុខាភិបាល, ការអភិវឌ្ឍធនធានមនុស្សសុខាភិបាល និងសកម្មភាពពហុវិស័យ ជាដើម។

ផ្តោតលើការកាត់បន្ថយចំណាយពីហោប៉ៅផ្ទាល់របស់ពលរដ្ឋ និងការជំរុញប្រសិទ្ធភាពចំណាយក្នុងវិស័យសុខាភិបាល តាមរយៈ ការបង្កើនការវិភាជថវិកា និងការលើកកម្ពស់ប្រសិទ្ធភាព និងស័ក្តិសិទ្ធិភាពនៃចំណាយក្នុងវិស័យសុខាភិបាល, ការរៀបចំធ្វើស្ថាប័នូបនីយកម្មនៃថវិកាតាមកម្មវិធីសុខភាព និងរៀបចំវិភាជថវិកាដោយផ្អែកលើតម្រូវការថែទាំសុខភាព, គោលការណ៍សមធម៌, ព្រមទាំងលើកកម្ពស់ស្វ័យភាពរបស់ អ្នកផ្តល់សេវាសុខាភិបាល ក្នុងការចាត់ចែងធនធាន និងធានាគណនេយ្យភាព, ការបង្កើនហិរញ្ញប្បទាន ផ្នែកតម្រូវការជាជំហានៗ, និងការអនុវត្តការទិញជាយុទ្ធសាស្ត្រក្នុងប្រព័ន្ធគាំពារសុខភាពសង្គម ជាដើម។

ផ្តោតលើកត្តាឆ្លងវិស័យដែលមានចរិតលក្ខណៈសម្រួល និងគាំទ្រការអនុវត្តទិសដៅគោលនយោបាយ អាទិភាពនៃវិមាត្រទាំង៣ខាងលើ ដែលរួមមានយន្តការអភិបាលកិច្ចអចិន្ត្រៃយ៍សម្រាប់ការគ្របដណ្តប់ សុខភាពជាសកល, ការកសាងសមត្ថភាពដល់ស្ថាប័ន និងភាគីពាក់ព័ន្ធ, យន្តការទំនាក់ទំនង និងផ្សព្វផ្សាយ, ការរៀបចំក្របខណ្ឌគតិយុត្ត, ឌីជីថលូបនីយកម្មក្នុងដំណើរឆ្ពោះទៅការគ្របដណ្តប់សុខភាពជាសកល, និងការតាមដាន និងវាយតម្លៃការអនុវត្តផែនទីបង្ហាញផ្លូវ។